2012年10月10日星期三

一個壞蛋的自白 黄智賢

FACE週刊 第281期

去年憑《潛行狙擊》的「辣薑」一角眾望所歸勇奪「最佳男配角」,黃智賢今年在《雷霆掃毒》裏再演大反派「潘 Sir」,又被指勁搶男主角林峯鏡,有些綠葉就是這樣,做好人平平庸庸沒法出頭,走上歪路反倒能殺出一條血路。

做奸角,黃智賢有他的底線。
首先,不能欺負女人。本刊前一期劇透有誤,誤指劇中潘 Sir有份強姦女主角徐子珊,黃智賢甚是緊張:「我係仆街,但係都唔係仆街到咁呀……我唔介意做奸角,但係奸到恰女人,我覺得係人格污點囉……」
第二,不願透露年齡。「有人話我 77年、有人話我 65年,冇咁後生亦都冇咁老……唔好講真實年齡啦,我仲後生,仲想拍多幾年㗎……」
從接他到場、到訪問結束送他上車,我用盡方法也沒能讓黃智賢自己說出真實年齡。 Ok,你不說,我自己計。
15歲進警察學校,完成兩年學堂生涯正式當差三年, 1989年入選無綫「青少年大使」入行,如無意外,黃智賢今年應該 43歲。
出道 23年,愈奸愈亮眼的黃智賢說:「乜都要計、乜都要爭,做奸人其實好攰……」

黄智賢

唔畀我,畀邊個?


去年拿完「最佳男配角」獎項,今年臨近台慶又執到「潘 Sir」支好籌,黃智賢曾經在訪問中說過,有信心冧莊。我問黃智賢,電視台獎項受人氣、關係、年資還有各種政治因素影響,去年已經輪過一次,冧莊?有冇咁易?黃智賢答道:「我反問你一句,唔畀我,畀邊個呢?」大口氣到咁?「舊年抽離咁睇,你同我都係一個觀眾,憑網上反應同收視,唔畀辣薑畀邊個呢?」原來 Ben哥哥是聽錯了問題,以為說的是去年。其實這一兩年間,對他來說並非是別人眼中的事業高峰:「呢兩年,唔可以話係高潮,係轉變。學似你話齋,你都係睇《閃電傳真機》大,公司同觀眾又係睇住我大,呢個轉變係累積返嚟。大家都睇到呢個人嘅質地係唔係成熟、處理角色係唔係到位,辣薑係一個代表啫,呢兩年嘅改變係咁多年累積返嚟嘅印象分。」播種 23年,終於看到成果,又激起團火、躊躇滿志總會吧?「演員除咗學做戲,仲要學識調整自己心態去接受得失。換句說話,心要有準備,唔一定要畀你。我都後生過,曾經覺得一定要畀自己過,唔畀,結果咪走囉……」

黄智賢95至 99年間,《真情》最受歡迎情侶莫過於「阿海」與「彩瑤」(張慧儀)
95至 99年間,《真情》最受歡迎情侶莫過於「阿海」與「彩瑤」(張慧儀):「之後收到嘅角色又係二、三線,無以為繼咪走囉。」

黄智賢
去年奪獎喜極而泣,黃智賢說今年提名未出不敢預測:「攞獎好似飯後甜品,畀唔畀你都要有心理準備。」

黄智賢人生唯一一次做男主角是 97年的古裝劇《真命天師》,黃智賢是男一,該劇配角有張家輝、滕麗名及徐濠縈。
人生唯一一次做男主角是 97年的古裝劇《真命天師》,黃智賢是男一,該劇配角有張家輝、滕麗名及徐濠縈。

黃智賢說得是 1999年,那年他在《真情》裏的角色「阿海」街知巷聞人氣高企,滿心以為上硬位卻繼續被投閒置散,一氣之下離開無綫北上拍劇:「我唔知你記唔記得,我都做過男主角, 97年套《真命天師》。日打夜打捱眼瞓拍咗 20集劇,擺喺聖誕檔(聖誕新年檔市民興外遊,收視例牌全年最低)出街,公司都係冇信心,剪走咗五集……你話可以剪咗五集都出得街嘅劇,劇本可以有幾好?你估我係周星馳咩,唔係話幾爛嘅劇本都可以憑個人表演扭轉劣勢咩?我以為公司會對我有個好啲嘅計劃,結果係派我做一個邊個做都死嘅角色,後生嗰陣想有更好發展,咪走囉。其實做男主角就係呢樣唔好,有個負擔要揹起成套劇, o依家,我唔會覺得我要揹起啲甚麼甚麼,將自己擺低啲,落番去一個簡單嘅層面,觀眾喜好同收視都控制唔到,淨係做好自己囉。早十年問我做唔做男主角,我會話,梗係做啦!我做演員,唔想做主角做咩? o依家……實際啲,你加我人工好過。」

不正常,小朋友。


黄智賢

那些年,我們都看過《新紮師兄》。那些年,我們都遇過鄰家男孩想型想威學似朝偉走去讀 Cadets(皇家香港警察少年訓練學校)。黃智賢就讀過 Cadets、當過差,不過不為型不為鐵飯碗,為的是離家出走。
「我細個住深水埗、屋企做小販,六歲開始被派去掹毛、刮腎、切葱切薑蓉,大啲就放血、劏雞做燒臘,我哋九個兄弟姐妹從來冇做過正常小朋友……我小學返下午班,一早起身帶住套校服落工場幫手,食完晏返學,返完學開檔,開完檔八、九點先至做功課。老豆好鍾意賭,每日臨收檔最多錢嗰陣,貴利就準時嚟到收數,日日還,日日再嚟攞,每日辛勞完,睇住全部畀晒貴利都仲係還唔完,日日如是直到中學,我真係好想脫離呢種生活,所以一滿 15歲,就走去讀 Cadets,不為甚麼,為佢哋有得寄宿。」

黃智賢(左一)說自己從小愛看電視想做電視, 20歲參加無 綫舉辦「青少年大使」選舉,順利入選做兒童節目《閃電傳真機》主持後入行
黃智賢(左一)說自己從小愛看電視想做電視, 20歲參加無綫舉辦「青少年大使」選舉,順利入選做兒童節目《閃電傳真機》主持後入行。

黃智賢說,九兄弟姐妹個個都識劏雞鴨整燒臘,不過最憎也是劏雞鴨整燒臘,出身後沒一個繼承父母衣缽:「阿爸阿媽雖然小學畢業做一世小販,但係我哋九個喺深水埗大,大個冇一個吸毒行古惑,呢啲都係阿爸阿媽教出嚟。阿爸成日一開檔就走去賭,留晒啲嘢畀我哋做,所以我最錫阿媽,覺得阿媽最勁。」
三年多前,黃母因為癌症離世,黃智賢說,人走了,有些回憶愈是清晰愈是抹不掉:「阿媽臨走時好鍾意講以前啲嘢,九個細路逐個講。我最記得讀書嗰陣有次俾訓導主任鬧,我先至知自己嗰朝頂完阿媽嘭埋道門就去返學,原來佢鞋都冇着一路喊一路鬧跟住我去到學校……訓導主任話我,我淨係識得喊,好內疚、好難受……嗰次以後,我學識叫自己錫阿媽:『黃智賢,你收吓把口啦,唔好再激佢喇。』我哋做仔女嘅,最遺憾係阿媽勞碌一世,冇畀佢享過福,最後嗰段日子醫病醫到好瘦,又係折磨……其實走咗係解脫,我同阿媽都係基督徒,我哋相信一句說話:『息去地上勞苦,回天家去。』人一生都係受苦,有咩好得過最後受完苦,返去天父嘅懷抱呢?」

我愛佢,佢知㗎!


堅信人一生都要受苦受難沒有例外,黃智賢因此與妻子達成共識不會生兒育女,拍拖十四年、結婚七年,與黃智賢夫婦做伴的,只有寵物。
「對老婆又係好愧疚,佢好敏感又冇我份人咁樂觀,佢最需要工作安穩喺經濟上有安全感,但係我做呢行,咁多年最畀唔到佢嘅就係呢份安全感。其實佢要求好簡單,唔求享受唔愛名牌,我今年份生日禮物仲爭緊佢……因為我叫佢去買個手袋,佢話自己唔需要。佢冇乜呢啲憧憬,我諗就算有過,跟咗我咁多年都俾我打沉咗……可能我細個捱慣,就算遇過難關,都唔覺得恐懼,唔會特別去記住。我淨係記得好多次要老婆為我憂心,其實我好想講啲實質嘅好消息,話我嚟緊會加人工、接咗啲咩戲,叫佢唔好擔心,但係實質冇,淨係空口講白話,淨係識得講:『唔使擔心!』我嗰句『唔使擔心』,愈講愈無力……我冇成日講出口,不過我愛佢,佢知㗎。所以我話,畀我做男主角,不如加我人工仲實際,我好想放個長假,同老婆去一次富富貴貴嘅旅行。」

黄智賢與太太 21年感情依然甜蜜
與太太 21年感情依然甜蜜:「佢唯一投訴係會話我好耐冇帶佢食好嘢,我就最鍾意反駁佢:『咩呀?噚日嗰餐唔算呀?』」

黄智賢15歲入警校, 17歲正式成為警察
15歲入警校, 17歲正式成為警察:「當差近三年,最多係捉小販、捉人亂過馬路同抄牌,我都追過賊,不過從來冇掹過槍。」

黄智賢

替綠葉們說句話


《雷霆掃毒》開播第三週,黃智賢說最苦惱是得罪不少林峯 fans
《雷霆掃毒》開播第三週,黃智賢說最苦惱是得罪不少林峯 fans。

再說回本刊早前劇透誤指「潘 Sir」黃智賢強姦「阿 Pat」徐子珊,黃智賢說影響真的不小:「好慘呀,強姦已經衰,仲要嗰個係徐子珊,有好多粉絲喺微博@我嚟鬧……我澄清完雖然有改善,但係你知唔知林峯仲多 fans,我做戲日日都要同林峯針鋒相對,套劇做咁耐就俾林峯 fans鬧咁耐,個個話見到黃智賢就憎!」
在此向黃智賢誠心道歉,劇情有誤連累他被罵。不過粉絲們能理智些嗎?做戲啫,唔使憎埋黃智賢喎!

撰文:朱小博
攝影:范仲良
髮型: Willie Chan@ Hair Corner
形象: Bryan@ the Flaming
服裝: MAGin

Orignal From: 一個壞蛋的自白 黄智賢

沒有留言:

發佈留言